早前馬頭圍道奪命「劏房大廈」三級火，造成四屍五命慘劇，引起社會各界開始關注劏房嘅居住安全嘅問題，不少意見都要求政府加強巡查劏房，以保障劏房住客安全。然而屋宇署為了巡查可能有劏房問題嘅單位，居然採用「爆門」嘅方法，強行入內巡查，此舉不但嚴重侵犯住客個人私隱，並且只係治標不治本，完全無助解決住客真正的問題。
所謂有頭髮邊個想做癩痢，有錢邊個想住劏房，香港劏房問題一直存在，主要因為香港貧富懸殊長期存在，而且持續惡化，加上政府被地產霸權和中共控制，只會維護佢哋利益。政府寧願賣地俾地產霸權，興建豪宅撈取巨利，都不願意撥地興建公屋和居屋，以解決低下階層居住問題，面對市民抗議時，只用拖延戰術，例如房屋署長栢志高表示，即使有合適土地興建居屋，最快要七年時間，才能落成。此外，年輕單身人士申請輪候公屋，需要等候十年。低下階層面對上樓機會愈來愈無望，儘管劏房危險重重，仍然不得不繼續居住。唔瞓劏房，唔通瞓街？
政府除了服務地產霸權外，亦服務中共。早前政府暗地裡推行「宜居灣計劃」，希望在無宣傳之下靜靜地通過諮詢期，被踢爆後才急急地舉辦公聽會，美其名曰粵港融合，實際上進行人口大換血，結合低下階層居住問題，試圖用經濟和行政壓力，將香港低下階層強行遷移入大陸，正係香港版本嘅上山下鄉，有建制人士更口出狂言，認為「低增值人士」應該離開香港，以騰出空間讓高增值人士來港。一旦成功，香港本土意識將會瓦解，民主自治將失去基礎，中共就可以分而治之，有如現在嘅西藏和新疆。
講到底，香港政府唔係服務港人，其身份有如殖民地買辦，只係權貴嘅家奴，香港市民自然要面對權貴壓迫和奴役，「低增值人士」甚至會被趕出香港！所以香港市民應當取回原本屬於我哋嘅權利，應當由香港市民做老闆，而唔係由公務員、權貴代理人或是土共去做老闆。
一旦取回自治權利，香港政府自然獲得授權去解決各種社會問題，不但不會拋棄低下階層，重會幫助佢哋解決居住問題，一旦佢哋嘅居住問題逐漸解決，劏房問題自然逐漸消失。並且香港政府也不會被地產霸權劫持，可以從香港整體利益出發，治理香港。到時，香港本土內嘅問題，可以自行解決，更加唔需要由外人如王光亞之流說三道四，指手劃腳，干涉屬於香港自治範圍的事務。
